Шмат гадоў таму найстарэйшы апазіцыйны актывіст Віцебска адмовіўся ад прыбытковай працы юрыста, абраўшы дзейнасць, якая найбльш адпавядае ягоным грамадскім і палітычным перакананням. У 1990-я ён стаў адным з заснавальнікаў Віцебскага гарадскога клуба “За дэмакратычныя выбары”, а пазней — рэадактарам гарадской газеты “Выбар”, аднаго з першых дэмакратычных выданняў Віцебска.
Ён выбраў шлях, на якім замест выгодаў было шмат перашкод: арышты за распаўсюд недзяржаўнай прэсы, штрафы за несанкцыянаваныя пікеты, спрэчкі з землякамі каля знакамітага ў Віцебску “сіняга дому” – бо хтосьці з віцяблян асуджае пазіцыю апазіцыянера, а хтосьці лічыць яго спраўным героем Беларусі…
Слова “выбар” заўжды было самым вызначальнаым у ягоным жыцці. Пра гэта Барыс Хамайда распавядае ў 15-хвіліннай дакументальнай стужцы, аўтары якой — журналістка Алена Сцяпанава (Віцебск) і відэааператар Аляксандр Зянкоў (Барысаў).
Аршанцы ўжо знаёмыя з гэтай творчай здымачнай групай : у студзені 2016 года ў Оршы адбыўся паказ дакументальнага фільма “Я лічу, што я шчаслівы” , знятага пра журналіста, настаўніка, барда і спевака Георгія Станкевіча. Тады ў прэзентацыі ўдзельнічаў і герой фільма, які даў невялікі канцэрт для прысутных.
Цяпер мастацкім дадаткам да прэзентацыі стане фотавыстава, прысвечаная Барысу Хамайду. Яе ўдзельнікі – віцебскія фотажурналісты, якія падзяліліся здымкамі з уласных архіваў. Таму ў гледачоў будзе магчымасць убачыць і падзеі канца 1990-х, калі існавала рэдакцыя газеты “Выбар”, і цяперашняе “працоўнае месца” спадара Барыса – у цэнтры горада пад бел-чырвона-белым парасонам, якое ў Віцебску невыпадкова называюць “выспай свабоднага слова”.
Адкрыццё фотавыставы і прэзентацыя дакументальнага фільма адбудуцца 5 чэрвеня (нядзеля) ў 14.30 па адрасе вул. Чырвонаармейская, 13
Запрашаем усіх ахвотных!
