Гісторыка-краязнаўчая канферэнцыя адбылася ў Оршы 10 снежня. Яна прысвечана 365-м угодкам надання Оршы Магдэбургскага права. Тэмай канферэнцыі была размова пра мінулае, сучаснае і будучае Базыльянскага (Пакроўскага) манастыра. Шмат гадоў аршанскія краязнаўцы змагаюцца за лёс гэтага будынка, які з кожным годам прыходзіў да ўсё большага заняпаду. У 2005 годзе яго перадалі праваслаўным. Толькі ў гэтым годзе справа зрушылася з месца і на памятніку рэспубліканскага значэння з’явіўся дах.
Шмат цікавага можна было пачуць на сустрэчы. Краязнаўца з Мінска Зміцер Крымоўскі выступіў на тэму: “Базыльяне ў гісторыі Оршы”. Мастак Мікола Купава, самы актыўны абаронца будынка, распавёў пра гісторыю Аршанскага кляштара базыльянаў. Ад краязнаўцы з Оршы Віктара Лютынскага слухачы даведаліся пра рукапісныя крыніцы 19 стагоддзя з былога Пакроўскага манастыра. Таццяна Вароніна, якая шмат гадоў змагалася за рэстаўрацыю манастыра, паведаміла слухачам пра гісторыю музея, які існаваў у гэтым будынку. Іераманах Серапіён, настаяцель Пакроўскага храма, намаляваў бачанне будучыні гістарычнага помніка.
Выступоўцы: Ірына Шарамед, прыхажанка Пакроўскага храма, Ірына Ігнацьева, старшы выкладчык Беларускай акадэміі мастацтваў, Іна Байкова, педагог, Тамара Ігнацьева, краязнаўца, распавялі пра выбітных людзей, лёс якіх звязаны нейкім чынам з гэтым месцам.
Канфэрэнцыю арганізавала Таццяна Вароніна з дапамогай Аршанская арганізацыі ТБМ.
